Greinasafn fyrir flokkinn: Greinar og pistlar

Pistlayfirlit er aðgengilegt á trú.is. Þá er talsvert af pistlum einnig á sigurdurarni.annall.is

Opinn fundur um biskupskjör

Stuðningsfólk mitt býður í kvöld, 29. mars, til opins fundar um biskupskjör og kosti kirkjunnar. Fundurinn verður í safnaðarheimili Neskirkju og hefst kl. 20. Örræður flytja Inga Rún Ólafsdóttir, Hreinn Hákonarson, Sigurvin Jónsson og Jóna Hrönn Bolladóttir. Fyrirspurninir og umræður. Lífsstíll þjóðkirkjunnar þarf að vera stíll hins opna og frjálsa samfélags. Allir eru velkomnir til fundarins, fjölmiðlar einnig því þetta verður opinn fundur.

Vonast til að sjá þig. Sigurður Árni

Pétri Kr. Hafstein þakkað

Pétur Kr. Hafstein lætur skyndilega af störfum, vegna heilsubrests, sem kirkjuþingsmaður og forseti kirkjuþings. Hann hefur reynst kirkjunni frábær leiðtogi, réttsýnn, hollráður og framsýnn. Hann hefur beitt sér fyrir markvissri eflingu kirkjuþings, sem æðsta stjórnvalds þjóðkirkjunnar.

Eitt af helstu baráttumálum Péturs er að auka áhrif og virkni leikmanna í starfi og stjórnun þjóðkirkjunnar. Í því verki hefur hann verið stefnufastur og skýrmæltur. Í biskupskjöri þessa árs njótum við stefnu hans og meirihluti kjörmanna er leikmenn.

Ég vil þakka Pétri Kr. Hafstein einurð hans og sýn um, að þjóðkirkjan megi ekki standa í stað heldur eigi stöðugt að breyta starfsháttum og skipulagi til að fólki, kirkju og þjóð verði þjónað sem best í framtíð.

Tími tækifæranna

Fimmtudaginn 29. mars, kl. 20 verður efnt til opins fundar í safnaðarheimili Neskirkju um biskupskjör og kirkjumál.

Stuttar framsögur flytja:

  • Hreinn Hákonarson, fangaprestur
  • Inga Rún Ólafsdóttir, sóknarnefndarformaður og kirkjuþingskona
  • Sigurvin Jónsson, æskulýðsprestur
  • Jóna Hrönn Bolladóttir, sóknarprestur

Til fundarins boðar stuðningsfólk dr. Sigurðar Árna Þórðarsonar í biskupskjöri.

Fundurinn er öllum opinn, kjörmönnum, sóknarnefndarfólki og öllu áhugafólki um kirkjumál.

Takk

Liðnar vikur í aðdraganda biskupskjörs hafa verið mér ríkulegur tími fræðslu og blessunar. Ég hef hitt stórkostlegt fólk, hlustað á merkilegar sögur, notið gestrisni, hlustað á óskir um að kirkjan lifi fallega og vel. Ég hef orðið vitni að þjónustulund framar skyldu og hlotið fararblessun margra.

Ég þakka stuðningsfólki, fjölskyldu minni og kjörmönnum, sem hafa treyst mér til biskupsþjónustu. Ég þakka meðframbjóðendum mínum fyrir góða og uppbyggilega samveru síðustu vikur. Ég þakka góðum Guði sem vakir yfir börnum sínum og veitir þeim kraft og gleði.

Kirkjan er kölluð til þjónustu við heiminn og spennandi tímar eru framundan. Prestar, söfnuðir og þjóðkirkjan eru tilbúin undir breytingar, vöxt og grósku í fjölbreytilegum samtíma. Verkefnin eru mörg og krefjast samstöðu og einingar. Kirkjan er farvegur möguleikanna og nú er tími tækifæranna. Guð geymi ykkur.