Greinasafn fyrir flokkinn: Mataruppskriftir

Fleiri mataruppskriftir er að finna á sigurdurarni.annall.is

Mataruppskriftir

Þorskhnakkar í skinku

Þorskhnakkar eru hentugir í þennan spænska fiskrétt – og vafðir í góða Parmaskinku. Rétturinn er fljóteldaður – 45 mínútur – og öllum þykir þetta góður matur.

Fyrir 4

2 pakkar kirsuberja- eða kokteiltómatar

2 rauðlaukar

5 hvítlauksgeirar

1 lúka grænar ólífur

700-800 gr þorskhnakkar skornir í 4 bita

1 tsk fiskikrydd eða ½ tsk chilikrydd

4 hráskinkusneiðar

steinselja – eða dill

ólífuolía

salt og pipar

Hitið ofninn í 200°C.

Skerið rauðlauk og hvítlauk þunnt, tómata og ólífur í tvennt. Setjið í eldfast mót, 4 msk. af ólífuolíu, salt og pipar og blandið öllu vel saman. Bakað í ofni í 15-20 mínútur.

Kryddið fiskinn með pipar og smá chili (ef þið viljið bit) og pakkið síðan parmaskinku utan um hverja fisksneið og setjið þorskinn ofan á tómatana og aftur í ofninn í aðrar 15 mínútur – eða þar til þorskurinn er eldaður í gegn og parmaskinkan orðin aðeins stökk.

Stráið saxaðri steinselju eða dilli yfir fiskinn.

Berið fram salat með og gott súrdeigsbrauð til að skófla, þ.e. þurrka, upp dásamlegan vökvan (þetta sem Ítalir kalla scarpeda). Þau sem vilja geta soðið bygg eða hrísgrjón og haft sem meðlæti. 

Parmaskinkan gefur yfirleitt nægilegt saltbragð við bökunina.

Ég fékk uppskriftina úr mbl en breytti að eigin smekk. Uppskriftin er frá Mörtu Rún Ársælsdóttur sem greinilega er matgæðingur. 

Skinkuvafinn fiskur er þekktur og virtur kostur við Miðjarðarhafið. Og heitin eru alls konar og hér eru þrjár útgáfur: 

Ítalska Pesce avvolto nel prosciutto
Franska Poisson enrobé / en robe de jambon
Spænska Pescado envuelto en jamón

Dad gracias al Señor, porque él es bueno; porque para siempre es su misericordia. Amén.

Mataruppskriftir

Kalkúnn tikka masala

Hvað á gera við jólaafgangana af kalkúninum? Þessi útfærsla á klassískum Punjabi-tikka masala hentar ágætlega og kryddin eru önnur en hefðbundin jóla- eða þakkargerðarkrydd. Kalkúnninn er skorinn í bita og síðan maríneraður í jógúrt, túrmerik, garam masala og hvítlauk. Tómatar og rjómi gefa sósunni yl og fyllingu. Berið fram með góðum hrísgrjónum.

Fyrir 6

Hráefni í maríneringu

2 tsk garam masala

2 tsk malað kóríander

2 tsk malað kúmen

1 msk papríkuduft

4 tsk malað túrmerik

1 tsk gróft salt

6 hvítlauksrif, fínt rifin eða mulin

4 tsk ferskt engifer, fínt rifið

250 ml grísk eða feit jógúrt

4 bollar eldað kalkúnakjöt (ca. 450 g), skorið í 3–4 cm bita

Í masala-sósu

4 msk smjör eða hlutlaus matarolía

1 stór laukur, þunnt sneiddur

6 kardimommuhylki, mulin

1 lárviðarlauf

1 tsk paprikuduft

½ tsk chiliflögur (valfrjálst)

1 tsk garam masala

1½ tsk gróft salt, og meira eftir smekk

2 msk ferskt engifer, fínt rifið

4 hvítlauksrif, fínt rifin eða mulin

2 msk tómatpúrra

1 dós saxaðir tómatar

500 ml matreiðslurjómi

¾ bolli ferskt kóríander, gróft saxað + nokkrir stilkar til skrauts

Safi úr 1 lítilli sítrónu

Meðlæti

Hrísgrjón, gott brauð og litríkt salat

Marínering

Blandið saman garam masala, kóríander, kúmeni, papríkudufti, túrmerik, salti, hvítlauk, engifer og jógúrti í skál. Blandið kalkúninum vel saman við. Hyljið og kælið í minnst 4 klst.

Masala – grunnur:

Hitið stóran pott eða steypujárnspott á meðal-háum hita. Setjið 3 msk smjör eða olíu út í. Bætið lauk, kardimommu, lárviðarlaufi, papríkudufti, chiliflögum (ef notaðar), garam masala og örlitlu salti saman við. Lækkið hitann og steikið, hrærið reglulega, þar til laukurinn er mjúkur og gullbrúnn, 10–15 mínútur.

Krydd og tómatar

Bætið 1 msk smjöri eða olíu út í. Þegar fitan er heit, bætið engifer, hvítlauk saman við og steikið í um 10 sekúndur. Hrærið þessu saman við laukinn. Bætið tómatpúrru út í. Setjið tómatana og safann saman við og kremjið þá með höndunum. Látið suðuna koma upp, lækkið síðan hitann og látið malla þar til vökvinn hefur nær gufað upp, 8–10 mínútur.

 Sósan og kalkúnn

Bætið rjóma og söxuðum kóríander út í. Kryddið með 1½ tsk salti og smakkið til. Látið malla á lágum hita, hrærið öðru hvoru, þar til sósan þykknar, um 40 mínútur. Fjarlægið lárviðarlaufið. Setjið kalkúninn út í og látið malla í 5–10 mínútur, þar til kjötið er vel heitt en ekki ofeldað. Hrærið sítrónusafa saman við rétt fyrir framreiðslu. Smakkið til með salti.

Skreytið með niðursöxuðu kóríander. Berið heitt fram með hrísgrjónum.

Þökkum Drottni því að hann er góður og miskunn hans varir að eilífu.

Myndina tók ég í úthverfi þorps í Kaliforníu. Þessir kalkúnar voru á vappi í hverfinu og voru til friðs. 

Mataruppskriftir

Lifrarkæfa – lifrarpaté

Lifrarkæfu búum við til fyrir Þorláksmessupartí og jól. Lifrarkæfan er dásamleg sem smágjöf fyrir jólin og mörgum þykir gott að eiga hana fyrir jólamorgun eða dásemdarstundir jóladaganna. Melabúðin og góðar kjötvinnsluyr hafa hakkaða svínalifur og svínaspekk í hálfs kílós pakningum sem léttir kæfugerðina. Verði ykkur að góðu

1 kg svínalifur

½ kg svínaspik

3-4 laukar – handsaxað

1 hvítlaukur – smáskorinn

3 tsk krydd, tímían, rósmarín, oreganó og chili – hlutföll að smekk

2 tsk pipar

2 msk gróft sjávarsalt

120 gr smjör

200 gr hveiti

3 dl mjólk

4 stk egg

Bakað upp með smjöri og hveiti og þynnt með mjólkinni. Eggin sett út í eitt og eitt í senn og hrærð sama við. Ekki látið sjóða. Kryddið, laukur og hvítlaukur sett saman við. Síðan kælt aðeins. Hakkinu blandað saman við. Ofn á 160 °C. Allt sett í form.

Síðan eru formin sett á plötu með vatni – þ.e. vatnsbað og soðið í ofninum ca. 1 klukkustund.

Augngælur eru ekki síður mikivægar en bragðgælur. Kæfan gleður augu ef rennt er ribsgeli yfir kæfuna þegar fulleldað er og skreytt með t.d. rósmaríngrein – eða berjum – eða bara fallegu kryddi. Rósapipar er nýtanlegur líka. 

Verði ykkur að góðu – og vert að þakka skapara alls sem er fyrir lífsgæðin. 🙂

Mataruppskriftir

Kjúklingur, karrý og mango-chutney

Þessi kjúkingaréttur er fljóteldaður og bragðgóður. Í gærkvöldi komu allir heim svangir úr puði dagsins. Hvað er í matinn? Hvenær? Mmmmm. Það var sem sé einlæg matarsókn við kvöldverðarborðið. Samfélagsgleði, kátínan var smitandi og maturinn hjálpaði til. Allir nutu, borðuðu vel og þökkuðu hjartanlega og þá er kokksi kátur.  Þorvaldur Karl, vinur minn, gaf mér uppskriftina fyrir aldarfjórðungi og ég eldaði hana oft eftir aldamót. Svo datt hún út en ég fann hana fyrir nokkrum dögum og ákvað að endurnýta. Myndin er slæm  – maturinn er betri.

Fyrir 4.

Hráefni

  • 800 g kjúklingakjöt, t.d. bringur, og skorið í bita eða strimpla
  • 3 dl mangó chutney
  • 300 ml rjómi
  • 1 msk tímían
  • 1,5 msk karrý
  • 1 tsk sítrónupipar
  • kjúklingateningur
  • Salt og pipar að smekk

Matseld

Skerið kjúklingakjötið í bita og kryddið með karrý, salti og pipar. Hitið olíu á pönnu. Steikið kjúklingakjötið á pönnunni þar til bitarnir hafa brúnast vel. Leggið kjötið síðan í eldfast mót.

Sósan: Hellið rjóma og mangó chutney á pönnuna sem kjötið var steikt í (eða í pott). Hitið við vægan hita, kryddið með tímían, karrý, sítrónupipar, kjúklingakrafti, salti og pipar. Hrærið vel í. Þegar sósan er nærri suðu hellið þið henni yfir kjúklinginn í eldfasta fatinu og setjið síðan inn í ofn og steikið við 180°C í 35 mínútur.

Meðan kjúklingurinn er í ofninum er ljómandi sjóða hrísgrjón og rista grófar kókosflögur (eða kókosmjöl) á þurri pönnu til að setja yfir hrísgrjónin þegar maturinn er borinn fram.

Bananar, skornir í bita, passa þessum rétti vel sem og ferskt salat. Svo er hægt að leika sér með eitthvað litríkt úr ísskápnm til að auka litríkið á diskinum.

Bæn

Þökkum Drottni, því hann er góður og miskunn hans varir að eilífu. Amen.

Mataruppskriftir

Jerúsalem shashuka

Við Ísak vorum í puði og útréttingum fyrri hluta dags og komum svangir heim. Shaskuka í Jerúsalem leitaði á huga minn. Til voru egg, laukur og paprikur í ísskápnum og flest sem þarf í shashuka. Við áttum líka alvöru grískan feta og dill. Eftir hálftíma vorum við farnir að borða þennan litríka undramat, ekki síðri en við Jaffahliðið í Zíon. Hér er uppskriftin

Fyrir 4

Hráefni:

  • 2–3 msk ólífuolía
  • 1 meðalstór laukur saxaður
  • 2 paprikur (rauð eða gul), skornar í ræmur
  • 3 hvítlauksrif fínt söxuð
  • 1 tsk kúmen mulið
  • 1 tsk paprikuduft (reykt ef til er)
  • ¼ tsk cayennepipar (eða eftir smekk)
  • 1 dós (400 g) saxaðir tómatar
  • 1 msk tómatþykkni
  • Salt og nýmalaður svartur pipar
  • 4–6 egg
  • Handfylli af dilli, kóríander eða steinselju

Matseld:

  1. Hitið olíu í stórri pönnu á miðlungshita. Steikið laukinn í 5–6 mínútur, þar til hann verður mjúkur.
  2. Bætið papriku og hvítlauk út í og steikið áfram í um 8 mínútur, þar til paprikan er orðin mjúk.
  3. Kryddið: Kúmen, paprikuduft og cayenne. Hrærið í 1–2 mínútur til að kryddið opnist í olíunni.
  4. Bætið tómötum og tómatþykkni út í. Látið malla í 10–15 mínútur þar til sósan er orðin þykk og ilmsterk. Smakkið til með salti og pipar.
  5. Gerið holur í sósuna og brjótið eggin varlega ofan í. Ýtið við hvítunni yfir í rautt umhverfið svo eggjahvítan steikist og hvítni alveg. Hyljið pönnuna og eldið á lágum hita í 7–10 mínútur, þar til eggjahvítan hefur stífnað en rauðan er enn mjúk.
  6. Stráið ferskum jurtum og muldum fetaosti yfir áður en borið er fram.

Ljómandi að nota snittubrauð til að skófla upp sósu – þetta sem Ítalir kalla scarpeda. Það er líka hægt að nota jógurt eða labneh í stað fetaostsins. Matreiðslan og hráefnanotkunin er opin og kallar á hugvit og spuna.

Bæn: Þökkum Drottni, því að hann er góður og miskunn hans varir að eilífu.