Greinasafn fyrir flokkinn: Mataruppskriftir

Fleiri mataruppskriftir er að finna á sigurdurarni.annall.is

Mataruppskriftir

Heimagert pestó

Auðvitað er heimagert basilíkupestó betra en það sem kemur úr búðarkrukkunum. Pestó er ekki aðeins gott með pasta heldur líka ofan á fisk, kjúkling, lamb, grillað grænmeti, með tómötum, mozzarella, brauði eða sem bragðaukandi skvetta út í súpur og pottrétti. Hér er klassískt pestóuppskrift.

  • 2 stórar lúkur fersk basilíka, um 50–60 g
  • 1 lítið hvítlauksrif
  • 30 g furuhnetur, létt ristaðar
  • 50 g parmesanostur, fínt rifinn
  • 1–1,5 dl góð ólífuolía
  • 1–2 tsk sítrónusafi (má sleppa en gefur bragð)
  • Salt eftir smekk
  • Nýmalaður svartur pipar

Matseld

Ristið furuhneturnar örstutt á þurri pönnu þar til þær ilma og fá smá lit. Kælið. Setjið basilíku, hvítlauk, furuhnetur og parmesan í matvinnsluvél eða mortél. Maukið svo gróft. Hellið ólífuolíunni saman við í mjórri bunu þar til pestóið verður mjúkt en ekki of þunnt. Smakkið til með salti, pipar og smá sítrónusafa. Setjið í hreina krukku og hellið örlitlu lagi af ólífuolíu yfir til að verja yfirborðið.

Hollráð

Notið ekki of mikið af hvítlauk. Eitt lítið rif er oftast nóg. Of mikill hvítlaukur tekur yfir bragðið. Ekki mauka pestóið of lengi. Það á að vera lifandi og dálítið gróft, ekki græn sósa án áferðar. Furuhnetur eru oftast notaðar en svo má nota valhnetur, möndlur eða pistasíur sem virka líka vel. Svo er til grænkálspestó fyrir þau sem eru með græna fingur og rækta grænkál yfir sumarið. 

Mataruppskriftir

Hamborgarabollur – kartöflubollur

Hér er uppskrift að dásamlegum hamborgarabollum. Kartafla í deiginu gerir brauðið létt og saðsamt. Kartaflan er eitt af mikilvægu leyndarmálunum varðandi bakstur á hamborgarabollum. Heimabakstur er bestur.

10–12 bollur

Hráefni

  • 2½ dl mjólk
  • 25 g ger
  • 1 egg
  • 2 msk sykur
  • 10 g salt
  • 50 g smjör, mjúkt
  • 500 g hveiti
  • 100 g soðin kartafla, stöppuð

Til penslunar

  • 1 egg
  • 2 msk mjólk
  • Sesamfræ (valkvætt)

Matseld

  1. Gerið leyst upp: Hitið mjólkina lítillega (volga, ekki heita) og leysið gerið upp í henni.
  2. Blandið saman: Bætið eggi, sykri og salti út í og hrærið létt saman.
  3. Deigið hnoðað: Setjið smjör, hveiti og stöppuðu kartöfluna út í. Hnoðið vel þar til deigið verður slétt og teygjanlegt (um 10 mínútur í hrærivél).
  4. Fyrsta hefun: Hyljið deigið og látið hefast við stofuhita í um 45 mínútur.
  5. Mótun: Setjið deigið á borð og skiptið í 10–12 jafna hluta. Mótið í bollur (eða pylsubrauð ef vill).
  6. Seinni hefun: Leggið á bökunarplötu og látið hefast aftur í 30 mínútur.
  7. Penslun: Hrærið saman eggi og mjólk og penslið bollurnar. Stráið sesamfræjum yfir ef vill.
  8. Bakstur: Hitið ofn í 200°C (yfir- og undirhiti). Bakið í 15–18 mínútur, eða þar til bollurnar eru fallega gullinbrúnar.

Uppskriftin er úr Alt for damene, 17. hefti, 23. apríl, 2026.

Mataruppskriftir

Besti hamborgari í heimi – laxborgari með mangó-jalapeño-blöndu og Alabama-sósu

Þetta er heimsins besti hamborgari. Í stað kjöts er lax notaður (nota má annan fisk að smekk). Hamborgarabrauðin eru heimabökuð, undursamleg og verða ekki betri. Við mælum með að þið leggið á ykkur baksturinn. Elín mín sá þessa uppskrift í erlendu blaði, keypti það, las uppskriftina yfir Jótlandi og heillaði svo karlana sína þegar hún kom heim. Þetta er veislumatur og hentar stórfjölskylduveislum, bæði í bústaðnum og líka að vetrarlagi þegar létta þarf lund!

Hráefni miðað við tvo og má margalda að vild.

Byrjið á að baka hamborgabollurnar. Uppskriftin er að baki þessari smellu. Síðan er farið að vinna við marineringu laxins, skera niður grænmeti og gera sósu. 

Lax

Ólífuolía

2 laxabitar með roði, um 150 g hvor

salt

2 cm ferskt engifer, fínt rifinn

1 hvítlauksrif, rifið

2 msk sojasósa

1 msk ostrusósa

1 msk hunang

1 msk sæt chilisósa

smá sítrónusafi

Mangó-jalapeño-blanda

1 mangó, skorið í litla ½ til 1 cm teninga

½ skalottlaukur, smátt saxaður

1 jalapeño, skorinn í litla teninga

1 rauður chili, skorinn í litla teninga

Ferskt kóríander, fínt saxað (má sleppa)

Safi úr 1 límónu

Skvetta af ólífuolíu

Salt 

Alabama-sósa

1 dl majónes

1/4 dl edik

1 msk mulinn svartur pipar

1 tsk salt

1 tsk sykur

skvetta af Worcestershire-sósu

bæta má við skvettu af chilli-sósu

Marinering

Blandið saman engifer, hvítlauk, sojasósu, ostrusósu, hunangi, sætri chilisósu og ofurlitlum sítrónusafa. Setjið marineringuna í poka eða skál með laxinum. Nuddið henni varlega inn í fiskinn og látið síðan standa á eldhúsbekk í 30 mínútur.

Mangó-jalapeño-blanda

Blandið mangó saman við skalottlauk, jalapeño, rauðan chili (kaupið íslenskan chilli J) og kóríander (líka íslenskur). Smakkið til með límónusafa, smá ólífuolíu og salti. Látið standa á borði þar til borgararnir eru settir saman.

Alabama-sósa:

Hrærið saman majónes, ediki, pipar, salti, sykri, Worcestershire-sósu og chili-sósu. Smakkið til, gjarnan með aðeins meira ediki ef þarf.

Laxinn

Takið laxinn úr marineringunni og þerrið roðhliðina. Hitið pönnu á meðalhita (grillpanna hentar vel). Steikið laxinn á roðhliðinni í 6–8 mínútur. Snúið honum síðan við og steikið áfram í um 1 mínútu. Takið fiskinn af pönnunni og látið hann hvíla í nokkrar mínútur. Fjarlægið roðið áður en borgarinn er settur saman.

Samsetning

Skerið hamborgarabrauðin í tvennt og ristið skurðflötinn (má sleppa ristun). Setjið salatblöð á neðri helminginn, síðan nokkrar skeiðar af Alabama white-sósu. Leggið laxinn ofan á og setjið vel af mangó-jalapeño-blöndunni yfir, eftir smekk. Lokið með efri helmingi brauðsins.

Ástæða er til að þakka fyrir líf og næringu: Bæn: Þökkum Drottni því að hann er góður og miskunn hans varir að eilífu. Amen.

Uppskriftin er úr Alt for Damene, nr. 17,  23. apríl, 2026, s. 17. Feðgarnir Cassius og Tim Vladimir gerðu uppskriftina og hún er í hamborgarabók þeirra. . 

Mataruppskriftir

Jerúsalemsalat

Þessi dásamlega salatuppskrift er úr Jerúsalembók þeirra Ottolenghi og Tamimi, sem vinir mínir á Hagamel gáfu mér einu sinni fyrir að skíra barnið þeirra. 

Hráefni og meðferð

1 rauðlaukur

100 g döðlur – Medjool eru bestar en hinar duga

1,5 msk. hvítvínsedik

Skerið döðlurnar í fernt á lengdina. Sneiðið laukinn í tvennt og síðan þvert og þunnt. Setjið lauk og döðlur í skál ásamt edikinu. Blandið vel saman og látið marinerast í hálfa klukkustund. Þá er edikið síað frá. Þrjár súrdeigsbrauðsneiðar (eða tvö pítubrauð rifin í bita).

75 g möndlur

1,5 tsk. sumac (1 tsk. sítrónupipar getur komið í stað sumac)

1/2 tsk. chiliflögur sletta af sjávarsalti

2 msk. smjör

1 msk ólífuolía

Grófsaxa möndlurnar. Skera súrdeigsbrauð eða góðar pítur í bita, ca 1 cm á kant. Hitið olíu og smjör á pönnu og veltið brauðinu á pönnunni í tvær mínútur. Kryddið þá með salti, sumac og chiliflögum. Setjið möndlurnar út í og steikið í tvær mínútur í viðbót.

Spínat 150 g – (alvöru spínat)

Kjarnar úr hálfu granatepli (pomegranate)

1 lúka bláber safi úr ½ sítrónu

Ólífuolía

salt

Setjið spínat á fat og þá brauðteningana og síðan möndlurnar yfir. Síðast bláber og granateplin yfir. Bætið einni msk. ólífuolíu saman við ásamt sítrónusafanum. Bragðið til með salti – ef þarf.

Mataruppskriftir

Andaconfit taco

Á mínu heimili eru uppskriftir metnar hratt og oftast prufaðar strax. Sumar gera sig og aðrar ekki. Galdur þessarar liggur í samsetningunni frekar en flækjustiginu. Við notum þessa uppskrift aftur síðar því maturinn var lofaður af heimilisfólkinu.

Fyrir 4 (miðað við um þrjú taco á mann)

4 stk. andalæri (t.d. dós úr Krónunni)

12–15 litlar tortillur

ólífuolía til steikingar

5 dl rauðkál, smátt skorið

2 dl majónes

2 dl sýrður rjómi

6 msk. ferskur appelsínusafi

6 jalapeño-sneiðar, smátt skornar

2 dl granateplafræ

5 msk. rauðlaukur, smátt skorinn

2 tómatur, smátt skorinn

Ferskt kóríander eftir smekk

4 msk. ferskur appelsínusafi

Fetaostur

Aðferð

Bakið andaconfit samkvæmt leiðbeiningum – og rífið kjötið í sundur með tveimur göfflum.

Skerið rauðkálið fínt og setjið í skál. Blandið saman majónesi, sýrðum rjóma, appelsínusafa og jalapeño. Hrærið vel og blandið síðan saman við rauðkálið. Skerið rauðlauk, tómat og kóríander smátt. Blandið saman við granateplafræ og appelsínusafa.

Hitið ólífuolíu á pönnu og steikið tortillurnar þar til þær verða létt stökkar. Gætið þess að þær brenni ekki. Setjið saman tacos með því að raða fyrst rauðkálssalati, síðan öndinni, granateplasalsa og að lokum smá fetaosti ofan á.

Uppskriftin var birt í mbl.is og er hægt að nálgast hana að baki þessari smellu. 

Bæn. Þökkum Drottni þvi að hann er góður og miskunn hans varir að eilífu. Amen.