Greinasafn fyrir flokkinn: Mataruppskriftir

Fleiri mataruppskriftir er að finna á sigurdurarni.annall.is

Mataruppskriftir

Blómkál – hvítlaukur og krydd

Foreldrar mínir ræktuðu blómkál og á hverju hausti var blómkál í boði. Við hámuðum í okkur hrátt blómkáli og mamma notaði blómkál í ýmsa rétti, sauð og steikti. Mér þykir gaman að yngri kynslóðin á mínu heimili hefur uppgötvað bragðgæði nýupptekins blómkáls: „Þetta er bragðupplifun,“ sagði sonur minn um daginn. Hér er blómkálsréttur með Ottolenghi-snúningi.

Blómkálshöfuð meðalstórt, skorið í 1-2 cm blóm (stilkurinn ekki notaður)

4 hvítlauksgeirar
1/4 bolli góð ólífuolía
1 tsk reykt paprika

1 tsk chlliflögur

1 tsk kúmmín

1/2 tsk túrmerik

Saltið og piprið að smekk.

Steinselja skorin til skreytingar
1 sítróna skorin í fjóra hluta

Blómkálið gufusoðið í 5-7 mínútur. Á meðan kálið er soðið er kryddið sett í olífuolíu á pönnu og hrært saman. Þegar kálið hefur verið soðið er það sett í kryddolíuna á pönnunni og steikt við meðalhita þar til það er gullið og augjóslega steikt. En pönnusteikingin ætti að taka 5-8 mín. Komið fyrir á diskum og streytið með steinselju eða dilli. Allt í lagi að smella þrílitri fjólu líka sem kórónu á diskinn. Blómkálstíminn er kartöflutími og því ljómandi að sjóða nýjar kartöflur, merja lítillega og hella yfir bráðnu kryddsmjóri. Betra verður það ekki.

Þökkum Drottni því að hann er góður og miskunn hans varir að eilífu. Verði ykkur að góðu.

 

Mataruppskriftir

Lambakóróna með kartöflusalati og myntu-jógúrtsósu

Lambakjöt er besta kjötið og nýjar kartöflur eru nammi. Uppskriftahugmyndir Bjarka Þórs Valdimarssonar voru í Mogganum í morgun. Þær vöktu athygli okkar og við aðlöguðum þær að smekk heimilsfólksins. Lambakórónur voru til í Melabúðinni (200 gr. á mann). Nýjar kartöflur eru dásamlegar fyrir kartöflusalat í byrjun ágúst. Við elduðum þetta heilsufæði til heiðurs nýjum forseta.

Kjötið var marinerað í nokkra klukkutíma. Við áttum ókjör af myntu og sítrónumelissu í garðinum og ég notaði mikið af báðum, fínsaxaði og bætti svo þurrkuðu tímían og rósmarín út í. Safi úr einni sítrónu bættist við, slatti af ólífuolíu, salt og pipar skv. smekk. Kjötið var penslað og leyft að standa (og best sem lengst). Þegar farið er að steikja er kjöthitamælir settur í kjarna á kjötstykkjum og steikt – á grilli eða í ofni – þar til hitinn er 67°C (sem er smekksatriði).

Myntu-jógúrtsósa

1 bolli grísk jógúrt 
1/2 bolli smátt skorin mynta
2 hvítlauksgeirar smátt skornir
1⁄2 tsk. kummin
1⁄4 tsk cayenne
Safi úr hálfri sítrónu
Salt og pipar eftir smekk
Öllum hráefnum blandað í skál

Sumarkartöflusalat

1 kg nýjar kartöflur
2 rauð epli
1 piklaður rauðlaukur (þokkalega fínt saxaður laukur og síðan safi úr einni límónu yfir og látið standa)
1 bolli majónes
2 msk. dijon-hunangs-sinnep
2 msk capers
Ferskt dill skv. smekk
Sjóðið kartöflurnar í 20-25 mín.
Blandið saman hráefnunum.

Ég átti ekki mynd af matnum – svo fallegar möndlukartöflur fá að tjá gæði matarins. 

Bæn: Þökkum Drottni því hann er góður og miskunn hans varir að eilífu. Amen

Mataruppskriftir

Besta blini-uppskriftin

Blinis (et. blini) eru smálummur sem hafa verið bakaðar úr ýmsum og mismunandi hveititegundum. Þær voru og eru smurðar eða skreyttar með alls konar áleggi skv. hefðum viðkomandi menningarsvæðisins, t.d. sýrðum rjóma, smjöri, kotasælu, kvarka, kavíar og ýmis konar fiskmeti sbr. reyktum laxi, grænmetis- og ávaxta-mauki og sultu. Blinirúllur eru gjarnan fylltar með kryddi og kjöthakki og eru n.k. frænkur pizzusnúða. Á Íslandi hafa pönnukökur löngum verið bornar fram með þeyttum rjóma og sultu og lummur með sultu. Smálummur – blinis – eru skemmtilegt fingrafæði fyrir veislur. Þær má gjarnan skreyta með ostsmyrju, grænu og fersku kryddi sbr. dilli eða steinselju og reyktum laxi eða öðrum passandi bragðgælum.

Bliniskreyting er heillandi matargerðargjörningur. Graslauksstjörnur nota ég á sumartímanum til að toppa bliniskreytingu. 

Fyrir útgáfuhóf bókarinnar Ástin, trú og tilgangur lífsins steikti ég 250 smálummur og þegar Ísak og Jón Kristján urðu stúdentar steiktum við fjölda af smálummum líka. Smálummur eru sælgæti.

1 bolli hveiti

1 egg

2/3 bolli mjólk

2 msk ólífuolía

1/2 tsk lyftiduft

1/2 tsk salt

Blandið öllu saman og steikið smálummurnar – 3-4 cm á pönnukökupönnu. Látið kólna.

Til eru blinipönnur sem ég hef prufað en mér hefur ekki þótt að þær gefi betri árangur en að baka frítt á pönnukökupönnu eða góðri steikingarpönnu. En um smekk er ósmekklegt að deila. Mér þykir skemmtilegt að blini verði í steikingu mismunandi í laginu og tilbrigði verði í lit líka.

 

Mataruppskriftir

Þorskur í puttanescasósu – kraftréttur vinnandi kvenna

Puttanescasósan er kennd við vinnandi konur í Napólí. Vinnandi konur eru alls konar og sósan er til í mörgum útgáfum. Ég nota fisk með þessari sósu en hún er oft notuð með kjúklingi eða pasta. Ég læt oft nægja að hafa grænt salat með. Kryddið er breytilegt og þegar graslaukur er nógur nota ég hann eða steinselju. Ofninn er settur á 180°C og svo er byrjað á vinnukonusósunni.

5 hvítlauksrif, pressuð

1 dós tómatdós – má notað kryddað tómatmauk t.d. m,eð basilíku, hvítlauk og oregano (400 g) þau sem vilja meiri sósu geta notað eina og hálfa dós. 

3 msk góðar ólífur

5-6 ansjósur smátt saxaðar

2 1/2 tsk kapers

1 tsk oreganó

1 tsk smátt saxað chili

2 msk basílíka fínt skorin

Hitið olíu í pönnu á meðalhita. Hvítlaukur og chili steiktur í 1 mínútu. Þá er ansjósunum bætt við og steikt áfram. Síðan fer tómatsósan yfir, þá ólífur, kapers og oreganó. Hrært lítillega og soðið á lágum hita þar grauturinn þykknar. Smakka til og salta og pipra að smekk. 

Ofnfast fat (ég nota tarínu) er smurt með olíu. Fiskstykkjunum ca 2 cm á þykkt er raðað í fatið, saltað og sósu hinna vinnandi kvenna síðan hellt yfir fiskinn. Fatið sett í ofn í 12 mínútur – eða þar til fiskurinn er tilbúinn.

Þökkum Drottni því hann er góður og miskunn hans varir að eilífu. Amen.

Kíkið á fjölbreytnina á netinu – margar útgáfur. Hér er ein útgáfan:

 

Mataruppskriftir

Osso Buco – hamingjusprengja fyrir nautnaseggi

Osso Buco er einn af ofurrétt­um Norður-Ítal­íu sem einfalt og gaman er að elda. Ítal­ir not­ar gjarn­an kálfaskanka í réttinn og nautaskank­ar nýtast því líka. Ég steiki oftast kjötið á pönnu og færi svo yfir í stóran ofnþolinn pott. Síðan steiki ég grænmetið, bæti svo við tómataviðbótinni, krydda og sýð, set svo þar á eftir soð og vín og helli síðan öllu dýrðarhráefninu yfir kjötið í pottinum. Ef ég hef byrjað eldamennskuna snemma set ég pottinn í ofn á lágum hita, t.d. 100°C. Annars er ofninn settur á 180°C eða 200°C ef fyrirhyggjan eða tíminn leyfir ekki hægeldamennsku. Ef enginn er pottjárnspottur á heimilinu er auðvitað hægt að nota ofnþolið fat með loki – nú eða sjóða allt á eldavél og hafa auga á potti og framvindunni og tryggja að nægur vökvi sé í fati eða potti.

Meðlæti getur verið bygg, pasta, risotto, hrísgrjón, kartöflusmælki – nú eða bara kartöflumús! Rétturinn verður heldur eintóna hvað liti varðar og því skemmtilegt að skreyta svolítið með rósmarín eða steinselju. Basilíka og kóríander gefa líka skemmtilegt fráviksbragð sem mörgum þykir eftirsóknarvert.

Fyr­ir 6-8

  • 6-8 sneiðar af Osso Buco-kjöti
  • 2- 3 stk. skalot­lauk­ar, saxaðir (aðrar laukgerðir duga ágætlega)
  • 3 sell­e­rístönglar skornir í ten­inga
  • 3 gul­ræt­ur, skornar í ten­inga eða þverskornar
  • 2 hvít­laukar (heilir en ekki lauf) saxaðir
  • 1 msk tímí­ankrydd
  • 1 msk rós­marínkrydd 
  • 3 lár­viðarlauf
  • 1 lúka söxuð steinselja eða 1 msk steinseljukrydd
  • 1 dós heil­ir eða grófsaxaðir tóm­at­ar
  • 1 dós saxaðir tóm­at­ar
  • 6 dl kjúk­linga­soð
  • 2 dl hvít­vín
  • ólífu­olía eft­ir smekk fyr­ir steik­ingu
  • salt og pip­ar skv. smekk 

Aðferð:

  1. Hitið 1-2 mat­skeiðar af ólífu­olíu á pönnu og steikið kjötsneiðarn­ar 3 mín­út­ur á hvorri hlið. Saltið, kryddið og piprið eft­ir smekk.
  2. Takið kjötið upp úr og setjið í pottinn og geymið meðan græn­metið er steikt og sós­an gerð.
  3. Steikið skalottu­lauk, sell­e­rí, gul­ræt­ur og hvít­lauk í um það bil 5 mín­út­ur í pott­in­um.
  4. Bætið síðan við tómöt­un­um og sjóðið í 3 mín­út­ur. Hrærið reglu­lega.
  5. Bætið við hvít­víni, kjúk­linga­soðinu, kryddjurt­un­um, stein­selj­unni og loks kjötsneiðunum.
  6. Setjið í ofninn í amk tvær klst. (ef ekki er sett í ofn er soðið við vægan hita í tvær klukku­stund­ir. Með lægri hita má hægelda.
  7. Vert er að snúa kjöt­bit­un­um við í suðu/steikar-ílátinu einu sinni til tvisvar á þess­um tíma og bæta við kjúk­linga­soði eft­ir þörf­um.
  8. Soðið á að þekja kjötið að amk þrem­ur fjórðu all­an tím­ann og um­lykja græn­metið.

Spilið endilega ítalska músík í undirbúningi og þegar sest verður að borði. Þakkarbæn fyrir hamingjusprengjuna, mat og líf má gjarnan stíga upp með kryddilmi og tónlist: Þökkum Drottni því að hann er góður og miskunn hans varir að eilífu. Amen – og Guði sé lof fyrir Osso Buco.

Á vefnum er fjöldi myndbanda um hvernig hamingjusprengjan Osso Buco er elduð og þar eru ýmsar skemmtilegar útgáfur af hráefnalistanum líka.