Sigríður Haraldsdóttir, landfræðingur

Ég kynntist Sigurði Árna Þórðasyni fyrst að einhverju marki þegar ég gekk til liðs við Kór Neskirkju árið 2005.  Sem formaður kórsins til nokkurra ára hef ég átt samskipti við prestana og aðra starfsmenn Neskirkju.  Við Sigurður erum auk þess nágrannar, eigum jafnaldra syni og síðast en ekki síst þá jarðsöng hann föður minn fyrir fáeinum árum.

Í samskiptum  mínum við Sigurð Árna hef ég kynnst mörgum af hans góðu kostum.  Hann er einstaklega jákvæður, óspar á hrósið og tekst þess vegna afar vel að hvetja fólk í kringum sig til góðra verka.  Þessu höfum við í kórnum fengið að kynnast því Sigurður Árni segir bæði okkur og söfnuðinum sem sækir Neskirkju hversu mikils hann metur okkur og okkar framlag  til safnaðarstarfsins og messuhaldsins.  Þá sýnir hann starfi okkar virðingu á ýmsan hátt m.a. með því að sækja tónleika kórsins.  Þannig eru prestarnir og starfsfólkið í Neskirkju.

Sigurður Árni hefur miklu að miðla og gerir það í ræðu og riti og í samtölum við fólk.  Hann er næmur á aðstæður og leggur sig fram um að hlusta og kalla eftir skoðunum fólks.  Hann sér það einstaka og jákvæða í orðum og athöfnum manna en kann jaframt að glíma við erfiðleika og ágreining og leiða fram sættir.

Það dylst engum sem hlustað hafa á Sigurð Árna í prédikunum að hann hefur gott vald á íslenskri tungu og leggur mikla rækt við tungumálið.  Slíkt ber vitni um hversu vænt honum þykir um móðurmálið og hversu mikilvægt honum finnst að  sýna því virðingu og nýta það með sem bestum hætti til þess að koma hugsunum sínum og boðskap á framfæri.

Persónuleiki, menntun, starfsreynsla og lífreynsla gera það að verkum að Sigurður Árni er kjörinn til þess starfs sem hann nú býður sig fram til.  Að mínu mati er einn af hans allra mikilvægustu eiginleikum að hann er sannur jafnréttissinni hvort sem það snýst um jafnrétti karla og kvenna eða jafnrétti ýmissa hópa í samfélaginu.  Þetta einkenni Sigurðar Árna ásamt getu til að miðla málum og leiða til sátta eru eiginleikar sem gætu skipt sköpum fyrir íslensku þjóðkirkjuna.

Jóna Hrönn Bolladóttir og Bjarni Karlsson

Biskupskosningar í seinni umferð

Nú verður kosið á milli tveggja frambjóðenda í biskupskjöri í seinni umferð og eftir miðjan apríl kemur í ljós hver hefur verið valinn til þjónustunnar. Við hjónin styðjum dr. Sigurð Árna Þórðarson til embættis.

Eitt það fyrsta sem maður nemur í návist Sigurðar Árna er það að hann er listfengur maður og hefur auga fyrir því fagra. Sá sem getur verið á valdi listarinnar hefur líka djúpan anda. Sigurður Árni hefur ekki bara auga fyrir tónum, orðum og litum heldur ber hann ekki síður skyn á litbrigði mannlífsins og honum er eðlislægt að sjá hið einstaka í fari þess sem hann mætir. Það er gott að vera nálægt Sigurði Árna því hann hefur áhuga fyrir því sem fólk hefur fram að færa og þegar hann tekur orðið í hópi fólks gerir hann það augljóslega til þess að varpa því aftur út í hópinn og leyfa hugmyndunum að taka á sig form. Allir sem þekkja Sigurð Árna þekkja hann af samtalinu, hlustuninni og velviljanum. Þess vegna vitum við að hann verður ekki leiðtogi sem einangrast með eigin hugsanir og hugmyndir heldur er hann leiðtogi sem alltaf er að læra.

Biskupsembættið er sterk táknmynd fyrir kirkjuna í landinu. Sá sem er biskup ber embættið á persónu sinni. Við höfum átt langa samleið með sr. Sigurði Árna og við vitum af reynslu að hann er opinn fyrir nútímanum.

Í persónu Sigurðar Árna sameinast ýmsir ólíkir pólar:
Þótt hann kunni manna best að hvíla í hefðinni og sinni hinu hefðbundna prestshlutverki þá vill hann um fram allt þekkja samtíð sína og horfa til framtíðar.
Undir fáguðu og hlýlegu viðmóti býr óþol í sr. Sigurði Árna. Óþol gagnvart ójafnrétti og hvers kyns þvingunarvaldi.
Hann á rætur í leikmannahreyfingu kirkjunnar og hefur alla tíð átt þá þrá að sjá barna- og unglingastarf kirkjunnar blómstra en um leið er hann doktor í trúfræði með áherslu á íslenska menningu.
Hefðbundinn kristindómur liggur sr. Sigurði Árna við hjartastað en einmitt vegna þess að Jesús Guðspjallanna er vinur hans hefur hann þróað með sér víðsýna og milda lífsafstöðu.
Sigurður Árni hefur lifað mikla reynslu bæði í starfi og einkalífi og hver sem kemur inn á heimili þeirra hjóna, Elínar Sigrúnar Jónsdóttur og Sigurðar Árna, finnur að undir þaki þeirra býr hamingja. Sigurður og Elín eru jafningjar og samherjar sem varpa ljósi hvort á annað.

Við berum þá von í brjósti að Sigurður Árni Þórðarson verði næsti biskup Íslands.

Birt á: http://hjonablogg.eyjan.is/2012/03/biskupskosningar-i-seinni-umfer.html

Takk

Liðnar vikur í aðdraganda biskupskjörs hafa verið mér ríkulegur tími fræðslu og blessunar. Ég hef hitt stórkostlegt fólk, hlustað á merkilegar sögur, notið gestrisni, hlustað á óskir um að kirkjan lifi fallega og vel. Ég hef orðið vitni að þjónustulund framar skyldu og hlotið fararblessun margra.

Ég þakka stuðningsfólki, fjölskyldu minni og kjörmönnum, sem hafa treyst mér til biskupsþjónustu. Ég þakka meðframbjóðendum mínum fyrir góða og uppbyggilega samveru síðustu vikur. Ég þakka góðum Guði sem vakir yfir börnum sínum og veitir þeim kraft og gleði.

Kirkjan er kölluð til þjónustu við heiminn og spennandi tímar eru framundan. Prestar, söfnuðir og þjóðkirkjan eru tilbúin undir breytingar, vöxt og grósku í fjölbreytilegum samtíma. Verkefnin eru mörg og krefjast samstöðu og einingar. Kirkjan er farvegur möguleikanna og nú er tími tækifæranna. Guð geymi ykkur.

Tími tækifæranna

“Hvað, hefur þú tíma til að vera hér í kvöld? Á ekki að telja á morgun?” Já, við Elín, kona mín, vorum á dásamlegu námskeiði um Lúther og undirbúning ferðar á Lúthersslóðir síðar á árinu. Og rétt áður en talið verður í biskupskjöri er heilsusamlegt að núllstilla og hugsa um eðli siðbótar og þjónustu kirkjunnar í sögu og samtíð. 2017 nálgast og ég er tilbúin til að vinna að því að kirkjan verði kirkja bóta og góðs siðar, hvernig sem á mál verður litið.

“Og hvernig líður þér?” var ég spurður í kvöld. Og mér líður ágætlega. Biskupskjör er ekki grískur harmleikur með eingöngu vondum kostum. Biskupskjör er fremur gleðimál með góðum kostum. Alla vega lít ég svo á, að hvað sem kemur út úr kjörinu hafi ég lært mikið, upplifað margt jákvætt og orðið svo margs vísari að ég komi út í stórkostlegum plús – óháð atkvæðamagni og útkomu kosningar. Ég hef notið fræðslu og blessunar í þessu kosningaferli. Þessar liðnu vikur hafa orðið mér ríkulegur tími, bæði persónulega og líka sem þjóni kirkjunnar og kirkjuþingsmanni. Ég hef fengið dýpri og betri skilning á þörfum kirkjunnar í landinu, afstöðu fólks, þörfum safnaða og hverju þurfi að breyta og hvað þurfi að bæta. Kirkjuþingsmaðurinn í mér hefur skarpari sýn á hvað þurfi að gera og leggja til á kirkjuþingi. Og kirkjan, fólkið, prestarnir og söfnuðurnir eru búin undir breytingar. Nú er tími tækifæranna.

Ég hef hitt stórkostlegt fólk undanfarnar vikur, hlustað á stórmerkilegar sögur, notið gestrisni, hlustað á sterkar óskir um, að kirkjan lifi fallega og vel, orðið vitni að þjónustulund framar skyldu, hlotið fararblessun margra. Ég hef notið stuðnings og velvilja samverkafólks míns á kirkjuþingi og í kirkjuráði, í öllum prófastsdæmum, í nærsamfélagi og meðal vina og samverkafólks í Neskirkju. Ég hef fengið ótrúlega margar hringingar, gagnrýni sem ég er þakklátur fyrir, blóðríkar umsagnir fólks sem eru ekki minningargreinar heldur lífsyrðingar. Allt þetta hefur orðið til að skerpa og efla.

Ég þakka biskupsefnum, sem hafa verið mér samferða um landið, en þó mest fyrir elsku þeirra gagnvart kirkjunni. Svo hefur mér þótt elja stuðningsfólks míns ótrúleg og langvarandi kraftaverk. Fyrir hug þeirra og verk er ég þakklátur. Svo er ég þakklátur Elínu, konu minni fyrir staðfestu, kátínu og jafnlyndi hennar, sem aldrei bregst. Við höfum svo sannarlega notið ferða og fundanna. Það er ómetanlegt að geta notið sterkrar lífsreynslu saman. Svo hafa börnin mín verið mér traust stoð. Þau hafa verið óspör á hvatningu í “biskupakeppninni” eins og sex ára synir mínir hafa kallað undirbúning biskupskosningar.

Kæru kjörmenn: Takk, þið sem studduð mig. Við alla kjörmenn vil ég segja: Takk fyrir að þið kjósið í þágu kirkjunnar og vegna framtíðar hennar. Kirkjan er farvegur möguleikanna og nú er tími tækifæranna. Guð geymi ykkur.