Til heiðurs CR7. Fótafimi Ronaldo er óumdeild, einbeitni hans og fagmennska. Við feðgar deilum oft um knattspyrnu og höfum ólíkar skoðanir á félögum, iðkendum, stjórum og hvað skiptir mestu máli í boltanum. En við erum sammála um að Ronaldo er einn mesti íþróttamaður okkar tíma. Ég dáist að því hve mikla töfra karlinn hefur í tánum en hef í gegnum tíðina stundum verið rasandi yfir sjálfhverfu kappans og furðað mig á að hann hafi ekki enn unnið með sársauka litla drengsins. Orðið svona herfilega misþroska. En svo gekk hann inn á Laugardalsvöll og var góður við börnin og íþróttagoð. CR7 var sólin í stjörnuliði Portúgala. Við klöppuðum öll honum lof og tjáðum þakklæti fyrir hið góða – en hitt ekki. Markið hans var óþarfi en hann hefur enn töfra í tánum. Myndirnar tók ég í Laugardal 20. júní á landsleik Íslendinga og Portúgala.
![](https://i0.wp.com/www.sigurdurarni.is/wp-content/uploads/2023/06/1R7A8650-scaled.jpeg?resize=1038%2C576&ssl=1)