Greinasafn fyrir flokkinn: Mataruppskriftir

Fleiri mataruppskriftir er að finna á sigurdurarni.annall.is

Mataruppskriftir

Salatsósa hússins

Þessi góða salatsósa var búin til upprunalega á veitingastaðnum Via Carota í West Village í New York og er orðin uppáhalds salatskvettan á fjölda heimila. NYT minnti mig á sósuna í dag og ég mundi að ég hafði búið hana til fyrir nokkrum árum. Volga vatnið í uppskriftinni kemur á óvart en vatnið mildar edikið og mýkir bragð. Hreint edik er oft ágengt – en salatsósa á að vera svo bragðgóð að fólk laumist til að ná sér í skeið til þess eins að fá sér sopa, aukasmakk! Þessi sósa er líka ljómandi á soðinn/steiktan aspas, salat, steik, fisk eða ofnsteiktan kjúkling. Ef báðar tegundirnar af sinnepi eru ekki til í búrinu má nota tvöfalt magn af þeirri tegund sem til er.

Magn: um 3½ dl

Hráefni

1 stór skalotlaukur
2 msk. + 1 tsk. þroskað sérríedik (eða annað gott edik)
1 msk. volgt vatn
2½ dl góð ólífuolía, extra virgin
1½ tsk. hunang
1½ tsk. Dijon-sinnep
1½ tsk. gróft sinnep
2 timíangreinar, blöðin tekin af og smátt söxuð – ½ tsk (eða þurrkað).
1 hvítlauksrif, fínt rifið
1 tsk. gróft salt, meira eftir smekk
½ tsk. nýmalaður svartur pipar

Aðferð

Saxið skalotlaukinn mjög fínt og setjið hann síðan í fínt sigti og skolið hann snöggt undir köldu vatni. Látið renna vel af lauknum og setjið síðan í skál. Bætið sérríediki og volgu vatni út í og látið standa í 2 mínútur.

Þeytið ólífuolíu, hunang, báðar tegundir sinneps, timían, hvítlauk, salt og pipar saman við. Smakkið til og bætið við salti eða ediki eftir þörfum.

Notið sem fyrst en hægt að geyma afganginn í lokuðu íláti í kæli í allt að einni viku.

Mataruppskriftir

Laxsalatskál með steinselju og kapers

Lax, sellerí og kapers blandast dásamlega kryddaðri jógúrtsósu. Sósan verður bara betri ef hún fær að standa. Laxsalatið má bera fram í eða með salatblöðum, með byggi, ofan á grænt salat eða einfaldlega eitt og sér. Ég mæli með að bera fram í skál fyrir hvern og einn. Fyrir fjóra.

Hráefni

  • 1 laxaflak með roði, um 700 g
  • 3 msk ólífuolía
  • Salt
  • ½ bolli grísk jógúrt
  • 2 msk Dijon-sinnep
  • 1 bolli fínt saxað sellerí, um 3 stilkar
  • ¼ bolli fínt söxuð steinselja
  • 2 msk kapers, látið vökvan renna af og saxið fínt
  • 1 msk fínt saxaður graslaukur
  • Blaðsalat, soðið bygg eða grænt salat sem meðlæti

Matseld

  1. Hitið ofninn í 190°C.
  2. Þerrið laxinn með eldhúspappír. Setjið pökunarpappír á bökunarplötu. Setjið helming af ólífuolíunni á bökunarpappírinn, leggið laxinn ofan á og dreifið síðan afganginum af olíunni yfir fiskinn. Kryddið með salti, um 1½ tsk. Bakið í 18–20 mínútur, þar til laxinn er mjúkur og losnar auðveldlega í flögur.
  3. Á meðan laxinn steikist í ofninum hrærið saman jógúrt og sinnepi í stórri skál. Bætið selleríi, steinselju, kapers og graslauk saman við og látið standa.
  4. Þegar laxinn er tilbúinn látið hann kólna alveg. Losið síðan bitana í flögum af fiskinum og bætið þeim í skálina með hinum hráefnunum. Fiskholdið ætti að losna auðveldlega frá roðinu sem má farga. Blandið varlega saman með sveigjanlegri sleikju þar til allt er rétt blandað. Ekki hræra of mikið, svo salatið maukist ekki. Smakkið til með salti.
  5. Setjið blaðsalat í skálar, setjið byggið næst í skálarnar og laxsalatið þar ofan á. Skreytið svo með fínskornum graslauk og steinselju. Geymist í loftþéttu íláti í kæli í allt að 3 daga.

Uppskriftina gerði Kia Damon og ég veiddi hana frá NYTCooking.

Þökkum Drottni því að hann er góður og miskunn hans varir að eilífu. Amen.

Mataruppskriftir

Sítrónukaka með bláberjum og möndlum

Þetta bragðundur kemur úr kokkhúsi Ottolenghi. Kakan er jafn góð allt árið – ekki bara á bláberjatímanum. Hún geymist í allt að þrjá daga í lokuðu íláti, en er auðvitað best á bökunardegi.

Hráefni

150 g smjör, við stofuhita, (líka til að smyrja formið)
190 g sykur
1 tsk fínrifinn sítrónubörkur
1 msk sítrónusafi
1 tsk vanilludropar
3 stór egg, léttþeytt
90 g hveiti, sigtað
1¼ tsk lyftiduft
⅛ tsk salt
110 g möndlumjöl eða fínmalaðar möndlur
200 g fersk bláber
70 g flórsykur

Bakstur

  1. Hitið ofninn í 190°C. Smyrjið 21 cm brauðform með smjöri. Klæðið formið með bökunarpappír þannig að pappírinn nái upp með hliðunum og auðvelt sé að lyfta kökunni upp úr forminu. Smyrjið pappírinn líka lítillega. Setjið formið til hliðar.
  2. Setjið smjör, sykur, sítrónubörk og vanilludropa í hrærivélarskál með spaða. Þeytið á miklum hraða í 3–4 mínútur, þar til blandan er ljós og létt. Lækkið þá hraðann í meðalhraða. Bætið eggjunum saman við í þremur skömmtum og skafið niður hliðar skálarinnar eftir þörfum. Blandan getur skilist, en það skiptir ekki máli; hún jafnast þegar þurrefnum er blandað út í.
  3. Blandið saman hveiti, lyftidufti, salti og möndlumjöli í annarri skál. Hafið hrærivélina á lágum hraða og bætið þurrefnunum saman við í þremur skömmtum. Hrærið þar til engir hvítir hveitiblettir sjást lengur. Stoppið hrærivélina og blandið síðan ¾ af bláberjunum varlega saman við með sleikju. Setjið deigið í tilbúna formið.
  4. Bakið í 15 mínútur. Takið þá formið út og stráið afganginum af bláberjunum yfir kökuna. Setjið aftur inn í ofn og bakið í 15–20 mínútur til viðbótar, þar til kakan er orðin gullinbrún en ekki fullbökuð. Leggið þá álpappír lauslega yfir formið og bakið áfram í 25–30 mínútur. Kakan á að hafa lyft sér vel og vera bökuð í gegn; hnífur eða prjónn sem stungið er í miðjuna á að koma hreinn út.
  5. Takið kökuna úr ofninum og látið hana kólna í forminu í 10 mínútur. Lyftið henni síðan upp úr forminu og setjið á grind þar til hún er orðin alveg köld.
  6. Þegar kakan er orðin köld er glassúrinn gerður. Setjið sítrónusafa og flórsykur í skál og þeytið saman þar til blandan er slétt. Bætið örlitlum sítrónusafa við ef þarf, þar til glassúrinn rennur hægt til þegar skálinni er hallað. Hellið glassúrnum yfir kökuna og dreifið varlega. Bláberin ofan á kökunni geta litað glassúrinn aðeins, en það gerir kökuna fegurri og heillandi.
  7. Látið glassúrinn stífna í um það bil 30 mínútur. Skerið síðan kökuna í sneiðar og berið fram. Og munið njóta með augum, munni og huga.

Þökkum Drottni því miskunn hans varir að eilífu. Amen.

 

Mataruppskriftir

Fljótlegur kjúklingur með harissa og apríkósu

Harissa er stefnugjafi og bragðundrið í þessum einfalda kjúklingarétti. Aðalatriðið er að velja vandað harissamauk, þykkt og maukkennt en ekki vatnsþynnta og lélegsa útgáfu. Styrkur harissa er mismunandi eftir framleiðendum og því ráðlegt að smakka áður en byrjað er að elda, sérstaklega ef einhver við borðið þolir illa kryddsterkan mat. Apríkósusulta eða apríkósumauk mildar kraft harissunnarm og ólífur veita seltu og bit. Malaður kanill gefur mildan og jarðbundinn undirtón í marokóskum tagine-anda.

Fyrir 4

Hráefni

  • 900 g úrbeinuð og roðlaus kjúklingabringa eða kjúklingalæri, þerruð vel
  • Gróft salt og nýmalaður svartur pipar
  • 1 msk ólífuolía
  • 240 ml kjúklingasoð
  • 2 msk apríkósusulta eða apríkósumauk
  • 30-60 ml vandað harissamauk – byrjið með 30 ml og smakkið til
  • ¼ tsk malaður kanill
  • ⅓ bolli ólífur kramdar og steinhreinsaðar eða steinhreinsaðar ólífur rifnar í tvennt
  • Stökkt brauð (couscous eða bygg getur komið í stað brauðsins)
  • Sítrónubátar, til framreiðslu
  • 2 msk fersk myntulauf, rifin, til skreytingar, má sleppa
  • 200 ml jógúrt
  • Blandað salat

Aðferð

  1. Hitið stóra, djúpa pönnu við meðalháan hita. Kryddið aðra hlið kjúklingsins ríflega með salti og pipar. Þegar pannan er orðin heit er ólífuolíunni bætt út á og kjúklingurinn lagður á pönnuna í einu lagi, með krydduðu hliðina niður. Kryddið þá hlið kjúklingsins sem snýr upp með salti og svörtum pipar. Steikið þar til kjúklingurinn er orðinn að mestu ljós á hliðunum, losnar auðveldlega frá pönnunni og hefur tekið fallegan brúnan lit að neðan, um 6–8 mínútur.
  2. Á meðan er kjúklingasoði, apríkósusultu, harissamauki og kanil blandað saman í skál. Hrærið vel saman svo sultan leysist upp og blandan verði jöfn.
  3. Snúið kjúklingnum við og steikið á hinni hliðinni þar til hann hefur tekið léttan lit og er ekki lengur bleikur. Hellið harissublöndunni á pönnuna, bætið ólífunum út í og hrærið og losið bragðmiklar steikingarleifar af botninum. Látið suðuna koma upp og sjóðið þar til sósan þykknar og kjúklingurinn er fulleldaður. Smakkið til með salti og stillið kryddunina eftir þörfum. Það fer eftir því hversu salt kjúklingasoðið og kröftugt harissamaukið eru.
  4. Berið strax fram með stökku brauði (og/eða couscous, eða byggi). Setjið sósu og ólífur yfir kjúklinginn. Ljúkið með því að kreista sítrónusafa yfir og strá rifnum myntulaufum yfir, ef vill.
  5. Blandað salat og jógurtin með á diskinn.

Bæn: Þökkum Drottni því að hann er góður og miskunn hans varir að eilífu. Amen.

Mataruppskriftir

Rabarbari í desert

Rabarbari er ekki aðeins góður í sultu eða saft heldur í desert líka. Að baka rabarbara í ofni er ljómandi aðferð til að nýta þennan jarðargróða. Stilkar og bitarnir mýkjast án þess að maukast eða uppleysast. Venjulegur rabarbari er súr og kallar á sætu. Auðvitað má nota sykur en hunang og hlynsýróp eru skemmtilegri sætugjafi og gefa líka bragð.  Ég marinera rabarbarann gjarnan í einn til tvo klukkutíma fyrir bökun. Ljómandi að bera bakaðan rabarbara fram með ís eða rjóma – nú eða með sandköku.

Hráefni

500 gr rabarbari, snyrtur og skorinn í um 2 cm bita

150 gr hunang og hlynsýróp

100 gr gott múslí

Til bragðbóta en valfrjálst: 1 vanillustöng, klofin eftir endilöngu – eða 1 tsk kardimommubelgir – eða 2,5 cm biti af fersku engiferi, skorinn í þunnar sneiðar (svo er hægt að fara skemmri leiðina og nota kanil- engifer- og kardimommu-duft)

Matseld

  1. Hitið ofninn í 200°C. Setjið rabarbara, hunang/hlynsýróp og bragðgjafa í um 2 lítra eldfast mót eða í ofnskúffu. Blandið vel saman.
  2. Bakið í ofni og hrærið einu sinni eða tvisvar á meðan og rabarbarinn er orðinn mjúkur. Þetta tekur um 12–20 mínútur.
  3. Bakið múslí í ofni í 5-8 mínútur.
  4. Berið fram heitt. Svo er hægt að setja rabarbarann ofan á góðan ís og toppa með múslí.